06 Apr Our reply to OLP’s lies – O le tala moni e uiga i le Samoa Planet

Faaliliuina – T.T.A.S.F

O se tasi o tagata lilo ua iloga, po o se isi o loo tusia ni tala i luga o upega tafailagi, faapea ai ma ni isi o loo lagolago i ana tusitusiga, sa latou leotetele mai ma tuuaia le nusipepa o le Samoa Planet e faapea o se pepa ua faatupeina pe umiaina foi e le mālō, ma o mā’ua agaga ua umia lea e le alii Palemia. O loo faapea mai le osofaiga a ia tagata, o le nusipepa a le Samoa Planet o se auupega faalauiloa mo le mālō ma ana polokiki ma o loo totogiina lenei nusipepa i le anoanoai o tupe faaaoga sese i faiga fa’aalatua mo ana tusitusiga.

O loo iai foi ni ona lagona mulimulitai ma fiafia i faamatalaga faatupu e uiga i mā’ua aga faaleulugalii ma ua ia faaigoaina ai i maua o ni ‘tamaitai aupito sili ona matautia ma faitogafiti leaga i totonu o le atunuu’. O se tuuaiga ma te lagona ua faatupuina ai ni lagona fia suesue atili o tagata ia i mā’ua, ae ua lelei, atonu e manaia foi ae ou lolomiina ia faaupuga i luga o so’u mitiafu.

O loo manino mai o lea osofaiga o loo lē fiafia i le nusipepa a le Samoa Planet ma ana galuega o loo faatinoina.

Ma e tele auala e mafai ai ona faaleaogaina se nusipepa po o se fai tusiga faasalalau faalauaitele.

O le tasi auala, o le faapea mai lea o le tusiga ua leaga tele ma e lē aogā mo se faitau. Ae o lea osofaiga na te le’i faaaogaina lea auala, auā o tamaitai o loo pulea le nusipepa ua anoanoai faailoga taualoa faavaomalō ua mae’a ona mauaina mai, ma ua tele foi ni konekarate faatusitusiga a le mālō faatasi ai ma faalapotopotoga o pisinisi tumaoti e mafua mai ona o le malosiaga o tomai tau tusitusiga o loo ma tauaveina.

O se tasi o mā’ua ua lolomiina le aofai o tusi faitau e 9 ma mauaina foi le faailoga taualoa o le Tusitala Maoa’e o le Pasefika 2018 e pei ona tuuina mai e le faalapotopotoga o mālō soofatasi mo Aferika, Keripeane, ma le Pasefika (ACP).

O le isi auala taufaaleaga o le faapea mai lea o la matou aufaigaluega o loo tapenaina tala fou, e lē aoaoina lelei, pe lē agavaa ma e lē lava le malamalama ia Samoa ma le lalolagi. Ae le’i faaaogaina mai foi lea auala e osofaia ai matou.

O le vaega o loo faamaopopoina lenei nusipepa e toatele i latou o loo umiaina tikeri ma faailoga tusi pasi maualuluga mai iunivesite na aotauina ai. Na soifua a’e i totonu o Samoa, ma ua tele ma anoanoa’i ni atunuu o le lalolagi ua malaga ese atu ai mo aoaoga ma galuega. O loo alaala ma tautua i totonu o nuu, ekalesia ma sa tele foi nisi atunuu ese na aumau ai mo ni nai taimi. O la matou Faatonu sa galue mo le 9 tausaga i suesuega ma iloiloga i mataupu faatulafono ma taitaiga o mālō. O le au tapena ripoti po o tusitala, e maoa’e foi latou taumafaiga faaleaoaoga, silafia faapisinisi, atoa ai ma le ponesi o le iloa lea faamaopopo se aiga ma tausi fanau ae o loo faatino ai pea le tele o isi matāfaioi.

O se tasi o mā’ua o se matai tautua nuu ma o se tamaitai ua pasia mo le tauaveina o soalaupulega faaletulafono, o se suetusi, o le tamaitai muamua foi lea ua taitaia le Faalapotopotoga o Tagata Faipisinisi i Samoa ma o se tamaitai e amanaia lona silafia i tulaga tau taitai, ma o loo saili iai le tofā a faalapotopotoga i Samoa faapea atunuu mamao auā le atinae.

Ma o loo totoe mai ai loa le taumafai e fesiligia le amiotonu po o le lē faaituau o se nusipepa po o se tusitusiga. Fesiligia ai loa le aano moni o la latou pisinisi. Mo la matou nusipepa, o loo osofaia i ma’ua e faapea o i maua o ni sooupu mo le mālō, ua tele ni oa ua maua mai tupe faaalatua, ma o le ala lena ua faapea mai, aua le talitonuina soo se lomiga a le Samoa Planet.

Ua atoa nei le masina o loo olo lava le fua ma taumafai e onosaia nei osofaiga lē faavaea o loo faia pea, ma o nei la, lea ua ou sauni ai e tuuina sao atu loa e tala moni e uiga i le Samoa Planet.

O le Samoa Planet na faavae mai e ni tamaitai se toalua e aofia ai a’u ma le tofa Tuiloma Lemalu Sina Retzlaff. O se galuega ma te faatinoina “faaopoopo” auā e tofu I maua ma taleni ma valaauina ua uma ona tofiaina ai I maua I isi auaunaga. O a’u o se tusitala o tusi ma solo, ma o loo ou vaavaaia foi gasologa o galuega mo le kamupani konekarate a lo’u toalua o le Young Steel. O Tuiloma e anaina le Pacific Global Solutions, o se pisinisi faafaufautua mo le tuufaatasia o faigafaavae ma taiala mo le vaaiga mamao faapea le faamaopopoina o ni feiloaiga tetele.

O Samoa Planet ua mae’a ona resitaraina faaletulafono o se pisinisi faapaaga i le Matagaluega o Tupe Maua.

Na ou amata i le 17 masina talu ai faatasi ma Tuiloma i le faatinoina ma le gaioiina o mea uma mo le pisinisi. Mo le uluai 6 masina, o maua o le #AuLēMomoe. O se auala faigatā na ui mai ai ma maua ai lesona mo le agai i luma. Ae o le atinae maua mai o se mea sili atu lea. E silia i le 100,000 tagata na latou asia le itulau a le Samoa Planet i le masina ua tuanai atu mai soo se tafa o le lalolagi. i le maea ai o le 12 masina o le auaunaga, ua maua mai ni faailoga taualoa faavaomalo se lua mai tusitusiga. Ma o loo tuuina mai peafeau faalototele ma  faamalosiau e le toatele e uiga i lo matou galulue mae’ae’a ina ia tuuina atu tala moni ma sa’o. O la matou ripotiina o le malaga asiasi mai a le Palemia o Niu Sila o Ardern i Samoa nei lea sa faapea foi ona amanaia e le au tusitala a lenei itulagi. Atonu ma te fou mai i lenei galuega, ae o i maua o ni tagata e a’o gofie, ua faigofie ai ona faatumauina so ma agavaa e talitonuina e tagata.

O Samoa Planet ua faafaigaluegaina nei ni tagata se toafa e aofia ai le Faatonu, se ofisa IT, ma ni ofisa tapena ripoti/tusitala se toalua, ae o le toatasi o I laua ua malolo lē tumau nei ona o loo feagai ma maitaga tau tinā.

I le tau amataina, e oo mai lava i lenei taimi, e lē o taitai ona maua mai i lea tusitusiga faanusipepa se seleni e talafeagai mo le faatumauina o galuega. E lē o aofia ai foi mā’ua na faavaeina mai le pepa i le lisi o le aufaigaluega totogi. Afai e lē lava seleni e maua mai, e faaaoga lava nai tupe mai o maua taga e tau faaopea ai le pepa (ae mo a’u e sau mai tupe o si o’u toalua). Soo se tasi na te tau amataina se pisinisi e mafai ona is silafiaina lea tulaga faigata.

O se faafetai tele i nei kamupani alolofa ua latou agai mai e lagolagoina le pepa e ala i le faalauiloaina o latou auaunaga i luga o le Samoa Planet. O se agaga faafetai ona o la tatou faiga paaga ma o loo iai le naunautaiga mo nisi foi paaga ia faaopoopo mai.

E leai lava se fesoasoani tau seleni matou te maua mai i le mālō. E leai foi se avanoa faalauiloa mo le Samoa Planet mai se Matagaluega a le Mālō. Ae maimau e pe ana mafai ona maua le avanoa e faalauiloa ai latou auaunaga ma faasalalauga, auā o se fesoasoani manaomia e faaauau ai le tautua! (Silasila ane ai CEOs a le Malō o loo fiafia i la matou auaunaga! Haha)

O lona uiga, afai e leai se mea ma te mauaina mai, aisea ma te faagaioiina ai pea le Samoa Planet? O le mea moni, e sa’o lelei, o loo iai faamoemoega o loo tanumia mai tua. Ma e fai si tele o ia faamoemoega.

Muamua, o le faatāua o tinā ma tamaitai. Tamaitai Samoa ma le atu Pasefika ia muamua. O lo latou leo, o galuega, o faamatalaga patino, ma taaviliga o loo aafia ai. Na iai se uo na tuuina mai se faitioga aanoa mo le Samoa Planet. Na ia fiafia i le tulaga tau i ripoti, ae “tele tele tou tusiga e uiga i tamaitai! Ua iloa gofie ai tou faaituau”. Na ou faaaogaina lea faitioga o se faamalosiau. (Na ou fai foi iai pe na faitio I isi tusi tala “I le tele o latou tusiga e uiga i alii! Ua iloa gofie ai foi lou faaitu’au”)

O le ta’ita’ia pea e le itupa o alii o le galuega faatusitala i le lalolagi ua lava faamaumauga ma tusitusiga i lea tulaga. E tutusa i totonu o potu faasalalau ma tusitusiga, o alii e taimua – o i latou e tele atu tupe e maua mai ai, e tele atu o latou taimi i luma o masini pue ata, ma e sili mamao atu foi a latou faamatalaga tusitusia nai lo o tamaitai – i se faatusatusaga i le 3:1. Ona o le Samoa Planet e na o le pau lea o le auala faasalalau i Samoa o loo pulea e tamaitai, o le ala lea o loo tuliutliloa ai le tau faapaleniina o lea faatusatusaga. E ui ina matou ripotiina soo se ituaiga mataupu, matou te faamuamuaina mataupu e fesootai ma le amanaiaina o tinā i tulaga tau atinae. E mafuli la matou lagolago i tinā i faiga faapisinisi, tinā i le tauina ma le finauina o mataupu tau i aafiaga i suiga maaleale o le tau, tamaitai i tulaga tau taitai, ma tamaitai i totonu o taaloga.

O na vaega o loo lalago faatasi ma la matou faatāua i mataupu tau atinae i Samoa ma lenei itulagi. Matou te talitonu e toatele tagata o loo galulue malosi i soo se tulaga aua le atinaeina o lo tatou atunuu mo le lelei. Matou te galulue ina ia amanaia a latou galuega ma o latou foi lagona.

Ae e lē na o le pau lena o la mā’ua mataupu matautia ma le taufaaleaga o loo faia. O loo ma finauina foi ia faasalalauina atu tala e uiga i le sauaina o tinā ma fanau i Samoa, ma galuega o loo faatino ina ia fōia lea faafitauli. O maua ma Tuiloma o loo tuuina atu i le Samoa Planet la ma fautuaga e afua mai i o maua lava olaga ma mean a ma molimauina e faatatau i mataupu nei o sauaga faaleulugalii. O le mafuaaga lea e atoa lelei ai lava le tolu aso o tau faalogo, ia iloa lelei ma ripotia soligatulafono tau sauaina o tina ma fanau po o le faasalalauina o auala e mafia ai e tatou ekalesia ona fesoasoani i lenei faafitauli. O le mafuaaga lea e tele ai lava ripoti e uiga i le sauaina o tamaitai ma fanau o loo ripotiina atu mai i Faamasinoga, ma tusia ai foi auala e mafia ai ona maua se Poloaiga Mo le Saogalemu i Samoa. E utiuti seleni, ma e oo loa i tulaga tau suesuega loloto, faataitaiga, ma te lē tuliloaina se mataupu e uiga i se masalomiaga o faiga faaalatua i totonu o se Matagaluega a le Malō, ae o loo tuliloa lava le mataupu e uiga i se Faamaumauga mo i latou e faia ni solitulafono tau faiga aiga.

E iai foi ma isi. E ave foi le faamuamua i ni faalapotopotoga itiiti i totonu o le atunuu e tele ina faasinomia e tagata lautele e pei o i latou ua tā’ua o faafafine po o faafatama. E na o le pau foi lenei o le auala o faasalalauga o loo iai le vaega faapitoa mo faafafine ma faafatama, ua faaigoaina o le Rainbow Planet, ma la matou ripoti faaauau e faailoa ai mataupu i nai nei faalapotopotoga laiti. O tagata Pasefika ua talenia ma maua tulaga maoa’e e amanaia ai latou taleni i atunuu i fafo, o le isi lea o’u fiafiaga sili.

Ou te ioeina la, ou te ioeina e ui lava i lo maua naunautaiga ina ia sa’o atoatoa le tuuina atu o la ma auaunaga faatusitala, e iai lava noataga faaletagata e taomia ai le Samoa Planet. Ae ma te le taumafai e nanāina. Ma i le ava tele i le taitai o lo tatou mālō, ae e leai se fesootaiga o ma’ua anava tau ma sini o loo tuliloaina, ma le tatou Palemia.

Ona ou fesili loa lea, aisea ua ala ai ona osofaia i ma’ua e lenei tagata o loo lafi pea? Faamata ua maua sona lagona fefe ona o ma’ua? O le a le mea e uiga i le Samoa Planet ma o ma faanaunautaiga ua faafefeina ai o ia?

Ona o le tele o nei faaupuga na lafo faasaga ia i maua e faapea o ni ‘taifau /paumutu /faotane’ (sei tulou), lē mafaufau ma faitogafiti leaga, ou te fesiligia la po o lenei osofaiga e mafua mai ona o i mā’ua o ni tamaitai Samoa o loo taumafai e tatala ni faitotoa fou i le lautele? Faamata o le isi lenei ituaiga sauaga agai tinā?

Pe faamata o se isi mafuaaga?

O aso uma lava o loo ou faitau atu ai i manatu tusia a i latou o loo mulimuli i lenei tagata lilo o loo lalauina mai ai o i mā’ua o ni tagata pepelo/ gaoi/lē faamaoni, ma o loo latou tauanauina le faaooina mai o ni manuaga ia mā’ua, susunuina, lelemoina ma ia faafalepuipuiina – mafua mai lava ona ua latou faitau i nei tusitusiga faatupufaalavelave ua tusia faasaga ia i maua.

E tatau ona ou faapea atu e leai lava se mea o a’u e afaina ai i ia faamatalaga. Leai se uiga. Peitai e lē o se faamatalaga sa’o lea tulaga.

O le mea moni, ua ou lagona le popole ma le fefe ona o le matautia o le loloto o lo latou feita mai. Ou te popole mo si a’u fanau aemaise i latou o loo nonofo i atunuu i fafo, ina nei mea ane ua aafia i nei tagata i se mea e fetaui ai, ma aafia ai fua latou i ni uiga sāuā ona o a’u. Ua tau lē maua se moe. Ou te tatalo i taimi uma mo lo latou saogalemu. Na ou lagonaina foi le faavaivai ma le musu loa e toe faaauau le Samoa Planet, ae faafetai i si o’u toalua i lona faamalosi’au mai ia te a’u i taimi na ou vaivai ai ma faasoa mai lona loto toa ma le finau.

Ou te toe tepa nei i tua i le tigā ma le faigatā na tauasa mai ai ina ia taunuu mai lenei nusipepa o le Samoa Planet i le tulaga ua iai nei. i taimi uma na ou toesea mai ai mai i si a’u fanau ina ia faataunuuina lenei faamoemoe, i aso na toetoe a lalafo ai loa auupega ae sa toe faamalosi pea. Ou te toe tepa i le malosiaga o matou tusitusiga ua faalototeleina ai ni isi ma ua maua ai ni suiga lelei mo ni isi…O se uiga matautia tele le faapalopalo ma le faasausili le taumafai lea o se isi e toesea lea manumalo i lona faatupuina o lenei faamatalaga e faapea o tupe faaalatua a le mālō ma ona taitai e mafua uma ai nei galuega o loo faia.

Leai.

O matou na faia. i le faamanuia mai o le Atua i le foaiina mai o le iloa, malosi ma le taleni – o matou na faia uma nei mea. O a’u, Tuiloma, ma la matou aufaigaluega finau, o a matou faufautua, ma le tapuaiga a nai o matou aiga ma uo.

O le asō, ou te faafetai ma ou mimita i le galuega o loo faia e le Samoa Planet, le tulaga maualuga o la matou faasalalauina o tala, faapea ma sini ma anava tau o loo tuleiina lo matou faamoemoe. Ou te loto tele e faapipii lo’u igoa i lenei galuega ma faapea atu, ioe, o a’u lea. O matou uma lea. Ma o mea ia matou te tautatala ai.

O la’u lu’i la i lenei tagata lilo taufaaleaga – faamata e mafai ona e tautala mai faapea?

No Comments

Post a Comment

Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support